ইমান অদ্ভুত ধৰণে সাহসী চিনেমা আগতে নাই চোৱা: Tullika Devi

প্ৰায় প্ৰতিগৰাকী নাৰীৰ অৱদমিত আশা-আকাংখ্যাক লৈ নিৰ্মান কৰা এখন অতি সৎ চিনেমা আমিষ। ভাস্কৰ হাজৰিকাক মই প্ৰশ্ন কৰিছিলো পৰ্দাৰ সন্মুখত আৰু পিছফালে ইমানবোৰ নৱাগত নাৰী আপোনাৰ চিনেমাত, কিবা সংযোগ? তেওঁ খুব সহজ উত্তৰ এটা দিছিল, চিনেমাখনৰ থীমটো অতি আৱেগিক সেইকাৰণে ইমানবোৰ নাৰীৰ সমাহাৰ! সঁচাকৈ দেশী-বিদেশী বিভিন্ন ধাৰাৰ চিনেমা চাইছো কিন্তু ইমান অদ্ভুত ধৰণে সাহসী চিনেমা আগতে নাই চোৱা। অসমীয়া ভাষাত এনেকুৱা এখন চিনেমা নিৰ্মান হোৱাক লৈ এফালে শিঁহৰিত আনফালে গৰ্বিত। চিনেমাখনৰ আৰম্ভনি, মাজভাগ আৰু সামৰণি ইমান অৰ্থৱহ যে আপুনি চকুৰ পলক নেপেলোৱাকৈ চাব লাগিব। কিমান বিবাহিতা নাৰী আছে যি সকলো থাকিও অপূৰ্ণতাৰ সাগৰত ককবকাই থাকে! আনৰ চকুত সফল-স্বচ্ছল এখন সংসাৰত কিমান নোকোৱাকৈ ৰৈ যোৱা অভিমানে সম্পৰ্কত চামনি পেলাই মনৰ সংযোগ অস্পষ্ট কৰি তোলে! শাৰীৰিক সম্পৰ্ক নোহোৱাকৈও শাৰীৰিক সম্পৰ্কতকৈ উৰ্দ্ধৰ মানসিক সম্বন্ধ হ'ব পাৰে। তপত মৰুৰ বালিত এছাটি পানী ছটিয়াই দিয়াৰ দৰে এই সম্বন্ধ গুচি যাব পাৰে অন্য এক স্তৰলৈ। য'ত ভাল-বেয়া বিচাৰ কৰাৰ যুক্তিবাদী চিন্তা অকামিলা হৈ পৰে। নিষিদ্ধ ফলৰ সোৱাদ এবাৰ হ'লেও সকলোৱে লোৱাৰ বাসনা মনত ৰাখে! আৰু এই অৱদমিত বাসনাৰ জুইকুৰাত যদি কোনোবাই বতাহ দিয়ে? সেই প্ৰেম কাহিনী হৈ পৰে ভয়ংকৰভাৱে নিবিড়। নির্মালী আৰু সুমনৰ এই 'ডাৰ্ক প্ৰেম' কাহিনীয়ে আপোনাৰ মন মগজু জোকাৰি যাব। প্ৰতিগৰাকী শিল্পীৰ অভিনয় ইমান সাৱলীল যে ইয়াৰ পিছত এওঁলোকক বেলেগ ভূমিকাত দেখিলেও এইকেইটা চৰিত্ৰৰ ৰূপতহে মনত পৰিব। কাহিনীটোৱে চিনেমাখন চোৱাৰ বহুত পিছলৈকো খেদি ফুৰিব আপোনাক, চিনেমাখনৰ বিষয়ে নাভাবো বুলি ভাবিও হাত সাৰিব নোৱাৰিব। যদি অলপ ধতুৱা মনৰ তেনেহ'লে চিনেমাখন চোৱাৰ সাহস নকৰিব। চিনেমাত এডভেন্সাৰ বিচৰা সকলৰ কাৰণে এইখন মহাভোজ, এক অৰ্থত আমিষ! ছবিঘৰত ইতিমধ্যে মুক্তি লাভ কৰিছে।

Originally published on Facebook: 
https://www.facebook.com/tulika.devi.1/posts/10213358364308031