এখন নিকৃষ্টতম কাহিনীৰ ছবি "আমিষ" চালো ৷ সংগীতকে ধৰি পৰিচালনাৰ দিশটোত ক’বলগীয়া একো নাই ৷ কিন্তু এক চমক সৃষ্টিৰ উদ্দেশ্যে কাহিনীটো জোৰপূৰ্বক লিখা হৈছে ৷ ইয়াতে কাহিনীৰ দুৰ্বলতা আৰু উদ্দেশ্য প্ৰকাশ হৈছে ৷ আৰু উদ্দেশ্য হ’ল এক ঘৃণনীয় কাহিনীৰ ছবি নিৰ্মাণ কৰা ৷ যাতে দৰ্শকৰ বহুদিনলৈ মনত ৰৈ যায় ৷
প্ৰথম কথা হ’ল - ছবিখন আৰম্ভ হোৱাৰে পৰা কেৱল মাংস আৰু মাংস ৷তাৰ বাহিৰে গোটেই ছবিখনত যেন অন্য কোনো দৃশ্য নাই ৷ অন্য কোনো সংলাপ নাই ৷এখন ছবি ইমান মাংসপ্ৰধান হ’ব পাৰেনে? এয়া কাহিনীৰ সংকীৰ্ণতা ৷ Experiment বস্তুটো আমি বুজি পাওঁ ৷ এয়া experimental হ’ব নোৱাৰে ৷
দ্বিতীয় কথাটো - এটা প্ৰেমৰ সম্পৰ্ক গঢ়ি উঠাৰ সমান্তৰালভাৱে এটা হিংসাত্মক বৰ্বৰ মানসিকতাৰ জন্ম নহয় ৷ প্ৰেমে মানুহক সংবেদনশীল হে কৰি তোলে ৷কাহিনীত দেখা গৈছে- সুমন আৰু ডা° নীৰি যিমানে প্ৰেমৰ প্ৰতি ধাবমান হৈছে সিমানেই তেওঁলোক সৌন্দৰ্যতা , মানবতাৰ পৰা বিচ্ছিন্ন হৈছে ৷ এয়া জীৱ বিদ্যাৰ বিৰোধী কথা ৷
প্ৰেমে মানুহক অত্যুত্সাহী কৰি তুলিব পাৰে, যাৰ কাৰণে সুমনে প্ৰতিদিনে ডা° নীৰিক নতুন নতুন মাংসৰ সোৱাদ দিবলৈ কৰা চেষ্টাক মানি ল’ব পাৰি ৷ কিন্তু ডা° নীৰি ? তেওঁ বিবাহিতা ৷ সন্তানৰ মাতৃ ৷ আৰু জেষ্ঠ্য তথা শিশুৰোগ চিকিৎসক ৷ তেওঁৰ সুমনৰ লগত এনেকৈ মাংসৰ পিছে পিছে ঘূৰি ফুৰিবলৈ সময় ক’ত? কাহিনীৰ দুৰ্বলতা ৷
উত্তৰ পুৰ্বাঞ্চলৰ মানুহৰএবিধ প্ৰধান আৰু প্ৰিয় মাংস খাদ্য হ’ল গাহৰি ৷ ছবিখন যিহেতু মাংস প্ৰধানেই তাত গাহৰিৰ মাংসৰ বিবিধ ব্যঞ্জনৰ উল্লেখ একেবাৰে বাদ পৰিল কেনেকৈ ?
তাৰোপৰি যিহেতু মানুহৰ মাংস খোৱালৈকে দেখুৱালে , তাৰ আগতে গৰুৰ মাংস খোৱাৰ অবতাৰনা থাকিব নালাগিছিল নে?
প্ৰেমক খুৱাবলৈ দুবাৰকৈ নিজৰ গাৰ মংহ কটাৰ পিছতো অসুস্থ হৈ নপৰাটো কাহিনীৰএটা সাংঘাতিক দুৰ্বল দিশ ৷
এগৰাকী শিশু চিকিৎসকে মাজৰাতি মৰ্গত গৈ Dead bodyৰ মাংস চুৰি কৰিব খোজাটো কাহিনীৰ স্খলন ৷ নিজৰ শৰীৰৰ মাংস কাটি নিজে ৰন্ধাটোও অতি উদ্ভট অতিৰঞ্জিত ৷
মদ ভাং ড্ৰাগছ আদিতকৈ মাংসৰ নিচা যে বেছি হ’ব পাৰে , সেয়া অবৈজ্ঞানিক ৷
বহুতে ক’ব খোজাৰ দৰে এয়া experimental কাহিনী হ’ব নোৱাৰে ৷ experimentৰ নামত কোনো প্ৰেমিক প্ৰেমিকাই ইজনে সিজনৰ গাৰ মাংস খাব নোৱাৰে ৷ মাংসৰ ভোকৰ নামত মানুহৰ মাংস খাব নোৱাৰে ৷ এয়া অতিকথন ৷
মুঠতে অবৈজ্ঞানিক কথা অতিকথন আৰু চিন্তাৰ দুৰ্বলতাৰে ছবিখনে চমক সৃষ্টি কৰিছে আৰু ব্যবসায়ীক দিশত সফলতা লাভ কৰিলেও সাংস্কৃতিক দিশত এখন অসফল আৰু অমানৱীয় ছবি ৷
Originally published on Facebook:
No comments:
Post a Comment