আমিষ আকৌ চাম: Archana Borthakur

'আমিষ' এখন অনন্য ব্যতিক্ৰমী চিনেমা। চিনেমাখন চোৱাৰ পৰা এতিয়ালৈকে চেতনাৰ কোনোবাখিনি জোকাৰ খাই আছে। এতিয়ালৈকে পৃথিৱীৰ বিভিন্ন ভাষাত যিসমূহ চিনেমা চালো ( এগৰাকী সাধাৰণ শ্ৰেণীৰ দৰ্শক হিচাপে) সেই সমূহৰ মাজৰ বিশেষ এখন চিনেমা হিচাপে ' আমিষ' সদায় মনত ৰৈ যাব। 'আমিষ' চিনেমাৰ সমদলৰ মাজত হেৰাই যোৱা চিনেমা নহয়। আমিষে চিন্তাক উদ্বেলিত কৰিছে। কি অসামান্য ট্ৰিটমেণ্ট, কি  Perfect Metaphor ৰ ব্যৱহাৰ ! বহু সময়ত সংলাপত নথকা কথাবোৰ কেমেৰাই কৈছে। ওপৰে ওপৰে চালে গোটেই চিনেমাখন মাংশৰে কথা। কিন্তু 'মাংশ' নিজেই ইয়াত এটা সাংঘাতিক ৰূপক। এটা আচৰিত ভোকৰ অনুঘটক। সুমনৰ ভালপোৱা প্ৰগলভ্, গতিময়। বিচনাত জপিয়াই নপৰাকৈ প্ৰেয়সীৰ শৰীৰলৈ যোৱাৰ বাট বিচাৰিছে তেওঁ। আনহাতে নীৰিৰ আছে সেই দূৰন্ত ভোক! ভোক বাঢ়ি গৈয়েই আছে। অপ্ৰাপ্তিয়ে বঢ়াইছে ভোক। অথচ নীৰিৰ জৰিয়তে প্ৰথমেই পৰিচালকে কোৱাইছে-যিকোনো ক্ষেত্ৰতে অত্যধিকটো যে বেয়া। আৰু শেষত নীৰিয়ে নিজৰ ক্ষেত্ৰতে নোৱাৰিলে এই অত্যধিকৰ ভাৰসাম্য ৰাখিব। অপূৰ্ব, অনবদ্য অভিনয় কৰিছে অঘ্ৰদীপ বৰুৱা আৰু ড. লিমা দাসে। এক অৰ্থত সুমন আৰু নীৰাৰ মাজত হেৰাই গ'ল ড. লিমা আৰু অঘ্ৰদীপ। সুমনৰ আচৰিত সৰলতা , অপাপ স্নিগ্ধতা , কেৱল ভালপোৱাৰ নামত নিজকে হেৰুৱাই পেলোৱাৰ উদগ্ৰ হেপাঁহ সকলোবোৰ ফুটাই তুলিব পৰা চকুহাল , হাঁহিটো ! আনহাতে নিৰীৰ অস্থিৰতা, নিৰীৰ অপ্ৰাপ্তি, অনিশ্চিতিলৈ সন্মোহীতৰ দৰে আগবঢ়া তাড়ণা সেই সকলোবোৰ ড. লিমা দাসে নিখুঁত কৈ ফুটাই তুলিছে। সাংস্কৃতিক অনুষ্ঠান এটাত প্ৰেক্ষাগৃহৰ আন্ধাৰ পোহৰৰ মাজত দোলায়িত ড. নীৰিৰ কাণৰ সেই ৰূপালী ফুলিপাতৰ দোলন ! কিমান কথাই যে কৈছে!  নীৰিৰ ঘৰুৱা পাৰ্টিত নীৰিয়ে স্বামীৰ কাণৰ কাষত আহি কিবা এটা কওতে সুমনৰ চকুত ঢলি পৰিছে বিষাদৰ অনেক নোকোৱা কথা ! ঘৰলৈ বুলি উভতি অহা সুমনৰ মোবাইলত নীৰিৰ মেচেজটো অহাৰ লগে সুমনে একেটা ৰাস্তাৰ বিপৰীত দিশেৰে পুনৰ ওভতনি যাত্ৰা কৰিছে।  এক অঘটনৰ যেন আগ জাননীহে। 

চিনেমাখনত সাংঘাতিক এটা চৰিত্ৰ ড. ইলিয়াছ। ড. ইলিয়াছে সমাজখন যেন প্ৰতিনিধিত্ব কৰিছে। স্নেহ , অভিভাৱকত্ব, উদ্বেগেৰে সমৃদ্ধ এই চৰিত্ৰটোৱে চিনেমাখনক অন্য এক মাত্ৰা দিলে। ড. ইলিয়াছে সস্নেহেৰে বিশ্বাস কৰিছে সুমনক। অথচ কিবা এটা অশুভ ইংগিতো প্ৰথমৰে পৰা তেওঁৱেই পাই আছে। একেবাৰে অজানিতে গোটেই ঘটনাচক্ৰত আটাইতকৈ সাংঘাতিক কামটো তেওঁৰ দ্বাৰাই হ'ল ,যিটো কথা কোনোবা এটা সংলাপত সুমনে ইংগিত দিছে। পৰিচালকে ড. ইলিয়াছক গোটেই জীৱনলৈ সেই দন্দত পেলাই থৈ গ'ল। সাগৰ সৌৰভৰ অভিনয়ত সুন্দৰ পৰিপক্কতা অনুভৱ হ'ল।  'আমিষ' আকৌ চাম।
- অৰ্চনা বৰঠাকুৰ (received on WhatsApp)