মানৱ মনৰ গোপন তলিৰ ছবি জানিবলৈ আমিষ এখন চাব লগা চিনেমা: Hemen Nath

(চিনেমা ৰসিকসকলে খুটি-নাটি বোৰ চায়নে?
নাজানো।
মই চাওঁ কিছু। খুটি-নাটি মানে ধৰক, আৱহ সঙ্গীত, সংলাপৰ প্ৰয়োজনীয়তা তথা সঠিকতা, সংলাপ প্ৰক্ষেপণৰ সময়ত চৰিত্ৰৰ facial expression, body language, চৰিত্ৰৰ আৱেগ, কেমেৰাৰ angle আদি।
ৰিভিও লেখাৰ যোগ্যতা নাই কিজানি, তথাপি চিনেমাখন চাই হোৱা ভাৱ লিখিছোঁ। চিনেমা সমালোচকসকলে ক্ষমা কৰিব।)

কাহিনী নিসন্দেহে ব্যতিক্ৰমী। একপ্ৰকাৰ taboo/ insanity/ sadism য়েই মূল বক্তব্য- বিশেষকৈ নিজৰ শৰীৰৰ মঙহ প্ৰেমাস্পদক খুওৱা অথবা যেনেকৈ হ'লেও মানৱ মঙহ খোৱাৰ চেষ্টা কৰাটো।
অভিনয় নায়িকাৰ সুন্দৰ, নায়কৰো, যদিও তেওঁ নায়িকাতকৈ কম নম্বৰ পাব।
কিন্তু নায়িকাৰ গিৰিয়েকে ইমান দিনৰ মূৰত আহিও দেখোন বৰ এটা আৱেগ নেদেখালে। ৰাতি শোৱোতে symbolic হ'লেও দেখুৱাব লাগিছিল যে তেওঁলোকৰ অন্তত: মিলন হৈছে।
দিলীপৰ সংলাপবোৰো থিয়েটাৰী হ'ল কিছু।
নায়িকাৰ বান্ধবীগৰাকীৰ অভিনয় খুব ভাল, দুয়োৰে মাজৰ সংলাপবোৰো বৰ খাপখোৱা, বন্ধুৰ মাজৰ কথাবতৰা তেনেকুৱাই। দুই বান্ধৱীৰ friendly talk ইমান বেছি natural হৈছে যে, গম নাপায় সেয়া অভিনয় বুলি।
সৰু সৰু সংলাপ অত্যন্ত natural হৈছে।
যেনে, ধাবাত মাংস খাবলৈ যাওতে নায়িকাই কোৱা- চামুছ এখন পালেই হ'ল আৰু!
বান্ধৱীয়ে কোৱা- তোৰ তাৰ লগত চব হৈ গ'ল?
নায়কে কোৱা- জহৰাটোৱে মাংস খোৱাৰ লোভত মৰিলেহেঁতেন।
ইমানবাৰ ইলিয়াছে নায়কৰ মঙহ কাটিলে, এবাৰো সন্দেহ নহ'ল? কথাটোত খুত থাকিল।
শব্দবোৰ (sound) পটকে বেছি হৈ গৈছে মাজে মাজে (standard version টো মই ভাল হেডফোনেৰে সৈতে চাইছো)।
নায়কে পাৰ্টীত পেগ বনাই থাকোতে, দিলীপৰ বন্ধুসকলৰ কথা-বাৰ্তা natural নহ'ল।
শেষলৈ নায়িকা মানৱ মাংসৰ বাবে পগলাৰ দৰে হ'ল, কিন্তু স্বাভাৱিক জীৱন- ডিউটি আদি চলাই আছে; মানি ল'ব পাৰি অনুৰাগ কাশ্যপৰ বাবে। প্ৰেমিকাৰ মাংসৰ লোভ পূৰাবলৈ নায়কে মানুহ মৰাটোও সম্ভৱ বুলিয়েই মানিব পাৰি, মানসিক বিকাৰ বুলিয়েই মানিছো।
কুকুৰটোৰ চিকিৎসা কৰি থকা অৱস্থাতে ইলিয়াছৰ নায়কৰ লগত কথা পতা দৃশ্যটো বৰ ভাল হৈছে, নহ'লে তেওঁ ভেটেৰিনাৰি চিকিৎসক বুলি প্ৰমাণ কৰিবলৈ আৰু বেলেগ প্ৰামাণিক দৃশ্য নাই; একেই কথা নায়িকাৰ ক্ষেত্ৰতো- একাধিকবাৰ শিশুক পৰীক্ষা কৰি থকা দেখুৱাইছে।
নায়িকাই নায়কতকৈয়ো মাংসৰ প্ৰেমত বেছিকৈ পৰিছে, আনহাতে নায়ক নায়িকাৰ প্ৰেমত ইমান ডুবিছে যে প্ৰেমিকাক সুখী কৰিবলৈ তেওঁ সকলো কৰিব পাৰে।
বন্ধুৰ লগত থাকিও মেছেজত ব্যস্ত থকা নায়কৰ অভিনয়, মুখত সৰু সন্তুষ্টিৰ হাঁহি, প্ৰেমৰ দুনীয়াত মচগুল হৈ থকাৰ উপযুক্ত প্ৰমাণ।

একেবাৰে ক্লাইমেক্সত দুয়ো হাতত ধৰিছে, দৃশ্যটোৱে দৰ্শকৰ মনত যেন বিষাদৰ ৰহণ সানি যায়।

মানৱ মনৰ গোপন তলিৰ ছবি জানিবলৈ আমিষ এখন চাব লগা চিনেমা। (অসমীয়াতহে, হলিউড বলিউডত মানৱ মনৰ অজানা ৰহস্যক লৈ নিৰ্মাণ কৰা চিনেমা আছে)